Xəzər rayonunda 31 Mart - Azərbaycanlıların Soyqırımı Günü ilə bağlı tədbir keçirilib
Aprelin 1-də Xəzər rayon İcra Hakimiyyətinin təşkilatçılığı ilə Mərdəkan qəsəbəsində yerləşən 123 nömrəli tam orta məktəbdə “31 Mart Azərbaycanlıların Soyqırımı Günü”nə həsr olunmuş tədbir keçirilib.
Tədbirdə RİH başçısının müavinləri və şöbə müdirləri, YAP Xəzər rayon təşkilatının sədri, Bakı Şəhər İcra Hakimiyyəti başçısının tabeliyində “Dendrologiya bağı” publik hüquqi şəxsin (PHŞ) İdarə Heyətinin sədr müavini, biologiya üzrə fəlsəfə doktoru, dosent Samirə Bağırova, rayonun hüquq mühafizə orqanlarının, təhsil, səhiyyə, idarə, müəssisə rəhbərləri, RİH başçısının qəsəbə inzibati ərazi dairələri üzrə nümayəndələri, bələdiyyə sədrləri, 123 nömrəli orta məktəbin müəllim və şagirdləri, eləcə də rayon ictimaiyyətinin nümayəndələri iştirak edib.
Xəzər rayon İcra Hakimiyyəti başçısının birinci müavini Elşən Qurbanov erməni vandallarının Azərbaycanda törətdiyi kütləvi qırğınlar, qətliamlar barədə məlumat verib.
O, qeyd edib ki, erməni daşnakları bu qətliamı törətməklə bəşər tarixində misli görünməmiş cinayətə imza atıblar. E.Qurbanov qeyd edib ki, 31 mart soyqırımına əsl hüquqi-siyasi qiymət 1998-ci il martın 26-da Ulu Öndər Heydər Əliyevin imzaladığı "Azərbaycanlıların soyqırımı haqqında" fərmanla verilib.
YAP Xəzər rayon Təşkilatının sədri Namiq Əhmədov, Xəzər rayon Ziyalılar Cəmiyyətinin sədri Təvəkkül Səlimov, Təhsil İşçiləri Azad Həmkarlar İttifaqının Xəzər rayon Komitəsinin sədri Həzərxan Əbilov bu qanlı hadisələrin yaddaşlardan heç vaxt silinməyəcəyini vurğulayıb.
Tədbirin sonunda 123 nömrəli tam orta məktəbin şagirdləri soyqırıma həsr edilmiş bədii kompozisiya ilə çıxış ediblər.
Sonra azərbaycanlılara qarşı ermənilərin törətdiyi soyqırımın qarşısını alarkən şəhid olmuş türk əsgərlərinin xatirəsinə ucaldılmiş abidənin önünə gül dəstələri düzülüb, şəhidlərin xatirəsi ehtiramla yad edilib.
